"Chaschuns d'emprender per uffants fin a 4" è in project da la Direcziun da furmaziun dal chantun da Turitg. La direcziun da furmaziun vul cun quai contribuir sia part per realisar las directivas da la politica guvernamentala 2015–2019.

Films per geniturs ed experts

Ils films èn duas fin quatter minutas lungs ed existan en 13 linguas. Els stattan a disposiziun en las quatter linguas uffizialas da la Svizra (tudestg, franzos, talian e rumantsch grischun) sco er en nov ulteriuras linguas: albanais, arab, englais, portugais, serbo-croat-bosniac, spagnol, tamil, tigrinya e tirc.
Ils films vulan cuntanscher geniturs e persunas da referiment dad uffants pitschens sco era spezialists davart la furmaziun, la tgira e l'educaziun tempriva. Els vulan esser ina funtauna d'inspiraziun, els vulan infurmar ed animar per percorscher e tractar process da furmaziun dad uffants pitschens en il mintgadi.

Serias da film 2014 e 2019

La Direcziun da furmaziun dal chantun da Turitg ha publitgà l'onn 2014 per l'emprima giada films curts davart chaschuns d'emprender en il mintgadi per uffants fin 4 onns. Ils films davart la furmaziun da lingua tempriva cumpletteschan l'emprima seria. En tut existan ussa 65 films davart l'emprender prescolar. Latiers vegnan da nov sis films da commentari cun explicaziuns davart l'acquisiziun da la lingua uffantila.

Context

Ils films curts da las Chaschuns d'emprender 2014 sa basan sin il "Rom d'orientaziun per la formaziun, la tgira e l'educaziun tempriva" (2012) che la cumissiun d'UNESCO svizra e la Rait svizra per la tgira d'uffants han publitgà. Punct da referiment spezialisà dals films Furmaziun da lingua tempriva 2019 furma il concept spezialisà ""Furmaziun da lingua tempriva"" (2017) ch'è vegnì sviluppà da la Scola auta da pedagogia da la Turgovia ed il Marie Meierhofer Institut für das Kind per incumbensa da la Direcziun da furmaziun dal chantun da Turitg.

Contact

Per geniturs e persunas da referiment dad uffants pitschens: sche Vus avais dumondas, As drizzai per plaschair ad in dals posts da cussegliaziun da geniturs: p.ex. cussegliaziun da mammas e babs, cussegliaziun d'educaziun u furmaziun da geniturs. Qua chattais Vus quests posts:
www.kjz.zh.ch/angebote-4

Per spezialists davart la furmaziun, la tgira e l'educaziun tempriva: infurmaziuns davart purschidas da perfecziunament chattais Vus qua:
www.bfs-winterthur.ch/weiterbildung

Per infurmaziuns u impuls davart ils films:
info@kinder-4.ch

Partenari da project

In project da la Direcziun da furmaziun dal chantun da Turitg

Cun sustegn da

En collavuraziun cun

Frühe Sprachbildung 2019 ÜF

Lotteriefonds Kanton Zürich; Stiftung Mercator Schweiz; Marie Meierhofer Institut für das Kind Zürich, Pädagogische Hochschule Thurgau, Netzwerk Kinderbetreuung Schweiz

Lerngelegenheiten 2014 ÜF

Lotteriefonds Kanton Zürich; Jacobs Foundation; Stiftung Mercator Schweiz; Viktor Dürrenberger-Stiftung Zürich; Marie Meierhofer Institut für das Kind Zürich; Partnerprojekt des Orientierungs-rahmens für frühkindliche Bildung, Betreuung und Erziehung der UNESCO-Kommission und des Netzwerks Kinderbetreuung Schweiz.